Abstract:
Еліміздің тəуелсіздік алуы бүкіл рухани-мəдени болмысымызды, əдебиетіміз бен тарихымызды жаңа
арнаға бұрды. Тəуелсіздік жылдары қазақ əдебиеттану ғылымы да тың соқпаққа түсіп, бұрынырақта
жіберген қателіктердің орнын толтыруға кірісіп кетті. Төл əдебиетіміздің тұтас тарихын бүгінгі уақыт
тұрғысынан қайта бағамдау мен дəуірлерге бөлу қазақ əдебиеттану ғылымының маңызды мəселесіне
айналды. Əдебиетші-ғалымдардың зерттеулері мен жаңаша ізденістері, тың көзқарастары негізінде
қазақ əдебиетінің түпкі арналары айқындалып, əдебиет тарихының түрлі кезеңдері мен оның негізін
құраушылар əдебиеттің өз заңдылығына сай сараланып, байыпталды. Мақалада əдебиет тарихын
дəуірлеу мен кезеңдерге бөлуге қатысты С. Қирабаев, Т. Кəкішев, М. Мырзахметов, А. Қыраубаева,
Т. Еңсегенұлы, И. Нұрахмет сынды əдебиеттанушылардың тəуелсіздік кезеңіндегі зерттеулері мен
соны ізденістеріне баға беріліп, талданды. Жаңа дəуір талабына сай қазақ əдебиеті тарихының
көптомдығын жасауды мақсат еткен, бір топ əдебиетшілердің құрастыруымен жарық көрген «Қазақ
əдебиетінің тарихы» он томдығының əдебиет тарихының сан алуан кезеңдері мен өкілдерін қамту мен
бағалаудағы рөлі, жеткен жетістігі мен жіберген кемшіліктері мақалада кеңінен қарастырылды.
